Link açıqlığı

Qırım «parlamenti» çarşenbe künü, iyülniñ 9-da, nevbetten tış toplaşuvında «Qırım Cumhuriyeti devlet Şurasınıñ Vesiqaları» mecmuasını tesis etti.

Qırım.Aqiqat mühbiriniñ bildirgenine köre, bu qararğa zalda bulunğan 77 deputattan 75 qol tuttı (umumen Devlet şurasında 100 deputat bar).

Jurnal yılda eñ azından 12 kere bastırılacaq.

Qararda aytılğanı kibi, yañı neşir üç qısımdan ibaret olacaq: Qırım «qanunları», Qırım «parlamentiniñ» qararları ve «Qırım Devlet şurası» prezidiumınıñ qararları.

«Qırım Cumhuriyetiniñ qanunları ve diger senetleri tertip nomeralarınen ayrı maqaleler olaraq derc olunacaq. «Vesiqalarnıñ» er bir maqalesinde senet ya da diger uquq vesiqasınıñ adı, onı imzalağan kişi, qabul etüv yeri ve sanı, qayd etüv nomerası basıla», – aytıla qarar metninde.

Qırım «parlamenti» 1994, 1998 ve 2004 seneleri «Qırım Muhtar Cumhuriyetiniñ vesiqalar cıyıntığı» mecmuası aqqında qararlarnı qullanılmağan olaraq tanıdı.

Yañı mecmuağa sarf etilecek para miqdarı qayd etilmey.

XS
SM
MD
LG