Link açıqlığı

Meclis Prezidiumı kendi yetekçilerine yapılğan basqı sebebinden narazılıq bildirip, qırımtatarlarnı birleşmege çağırdı


Qırımtatar halqı Meclisi milletniñ aqları, umumen insan degerlikleri bozulğanı sebebinden narazılıqnı bildire

Bu aqta Mejlis prezidiumnıñ arizasında söz yürütile, onı temsiliy organnıñ saytında yerleştirdiler.

Vesiqada aytılğanı kibi, qırımtatarlar liderleri Mustafa Cemilev ve Refat Çubarovğa Qırımğa kelmege yasaq etilüvi – başqacasına tüşüngenlerniñ cezalanuvı kibi añlamaq mümkün.

«İnsannıñ eñ tabiy aqlarınıñ, halqara qanunlarınıñ bozuluvı, bütün milletniñ menligine toqunuvı, milliy lider Mustafa Cemilevniñ, şimdi ise, Meclis reisi Refat Çubarovnıñ taqip etilüvi, çeşit uydurmalarğa esaslanıp yapıla ve fikirleri akimiyetten farq etkenlerniñ cezalanmasını köstere», – dep qayd etile arizada.

Meclis Prezidiumı qırımtatarlarnı Mecliske sarılıp, halqara uquq qorçalayıcı teşkilâtlarğa muracaat etmege ve «kendi Vatanında bulunğan qırımtatarlarğa nisbeten merhametsiz ve aşalayıcı areketlerniñ keñişlevine yol bermemege» çağırdı.

«Meclis Prezidiumı bütün qırımtatarlarnıñ aq-uquqlarınıñ ve Qırımda yaşağan er türlü millet ve din vekillerini qorçalaycağını bildire», - dep qayd etile arizada.

Öz başına tayin etilgen akimiyet yarımadağa Meclis reisi Refat Çubarovnı yibermedi. O, Herson vilâyeti Geniçeskte iyül 4-5 künleri arasında ötkerilgen Meclis toplaşuvından qayta edi. Çubarovğa 5 yıl içinde yarımadağa kelmege yasaq etildi.

Qırım «baş naziri» Sergey Aksönov mühbirlerge aytqanı kibi, Meclis reisi Refat Çubarov «Qırımda milletlerara zıddiyetke ketirgen areketleri» sebeinden yiberilmedi.

Eki ay evelsi tamam bu kibi yasaqqa milliy lider Mustafa Cemilev oğratılğan edi.

XS
SM
MD
LG