Çarşenbe künü, iyülniñ 9-da, Qırım «parlamentiniñ» nevbetten tış toplaşuvında «ekinci vatandaşlıq» meselesi baqılacaq.
Qırım «parlamentiniñ» saytında berilgen beyanatta aytıla ki, Ukraina vatandaşlığı aqqında laf kete.
«Qırım Cumhuriyetinde yaşağan ve Rusiye vatandaşı pasportını elde etken vatandaşlarnıñ çetel devletniñ (Ukraina) vatandaşı olmaqtan vazgeçüv aqqında arizası olsa, olarnı bu devlet vatandaşı olaraq tanımamağa teklif etile», – dep tekrarlay Qırım «spikeri» Vladimir Konstantinovnıñ aytqanlarını onıñ matbuat hızmeti.
İşbu mesele toplaşuvda baqılacaq «Rusiye Federatsiyasına Qırım Cumhuriyetini qabul etüv ve Rusiye Federatsiyası terkibinde yañı subyektler – Qırım Cumhuriyeti ve Aqyar federal şeeriniñ peyda oluvı aqqında» Federal anayasa qanunınıñ deñişmeler aqqında» federal anayasa qanun leyhasını Devlet Dumasına kirsetüv boyunca qanun çıqarıcı teşebbüs meseleleri cedveline kirmekte.
Umumen nevbetten tış toplaşuvda 49 mesele baqılacaq, olardan 24 – qanun leyhaları (12 – ekinci oquvda, 12 – birinci oquvda), ve 25 qarar leyhası.
