İşğal etilgen Aqmescitte qırımlılar içün birinci Rusiye bayramı – Qoranta, sevgi ve sadıqlıq Künü – olıp keçti. Trenöv bağçasında bayram teşkilâtçıları Aqmescit şeer şurası ve Merkeziy rayon şurası oldılar.
Programma çerçivesinde yarış ve bahşışlarnen kontsert ötkerildi.
Aqmescit sakinleriniñ bayram teessuratları farqlı oldı, dep haber ete Qırım.Aqiqat mühbiri. Sakinlerniñ teessuratlarını ayretten başlap açuvğa qadar qayd etmek mümkün.
«Bunıñ kibi bayramnı biz eşitmedik bile, ayrette qaldıq, bizge ayırılğan diqqatları içün minnetdarmız, yaşağan yılları, aman-aman 50 yıl, içün berilgen mukâfatlarnı endi aytmayıq», – dep teessuratlarnen paylaşa Yuliya Stepanovna.
Lâkin bazıları işğal etilgen Qırımda bayram olması içün sebep körmeyler.
«Sovetler devrine beñzey. Razı olmağanlarnıñ mitinglerini yasaq etkende, bunıñ episi mısqıl kibi körüne. Mında yanğırağan bir ukrain türküsi de aynı. Ukrain tili yaşayışnıñ er bir saasında yoq etilgen şeerde», – dep tedbir aqqında tüşüncelerinen paylaştı Aqmescitli genç Yevgeniy.
Malüm olğanı kibi, Qoranta, sevgi ve sadıqlıq Künü işğal etilgen Qırımda ilk sefer qayd etildi. Rusiyede bu bayramnı ilk sefer 2008 senesi iyülniñ 8-de qayd etken ediler.
