Qırımtatarlar Rusiye akimiyetiniñ Qurultay-Meclis sistemasını nezaret altına almaq ve bozmaq ıntılışlarına qarşı çıqmaq kerek. Böyle bir fikirni Yaqın şarq tedqiqler Merkeziniñ müdiri İgor Semivolos Qırım.Aqiqat saytına bildirdi.
«Qırımtatarlar halq olaraq yaşap qalmağa isteseler, olarnıñ başqa çaresi yoq, Rusiye akimiyetiniñ niyetlerine qarşı çıqmalı», – dedi o.
İgor Semivolos Refat Çubarovnıñ Qırımğa kiriş yasağını aytıp, Meclisni bu şekilde sıqıştıracaqlarını ayttı.
Onıñ fikirince, Rusiye akimiyeti küz saylavları arfesinde Meclis işini bozacaq ola ve buña «şimdi Yedinaya Rossiya cedvelinde üçünci yerni alğanlarnıñ» yardımınen irişecek ola.
İşğalciler, onıñ fikirince, Qırımtatarlarnıñ Qurultay ötkerilmesini isteyler, çünki qırımtatar halqınıñ liderleri bu esnasta doğrudan-doğru iştirak etip olamazlar.
Buña irişmegen olsalar, «işbu institutnı bir de bir qararlar almağan organğa çevirmege, yani onı yoq etmege tırışacaqlar», dep tüşüne İgor Semivolos.
Bundan sebep, ekspertniñ fikirince, Qurultay delegatları Qurultaynıñ Rusiyege «uyğun kelgen kün tertibini belgilemege» imkân bermemek kerekler.
Malüm olğanı kibi, iyulniñ 5-de Geniçsekten qaytqan Meclis reisi Refat Çubarovnı Qırımğa kirsetmediler. Oña Rusiyege 5 yıl devamında kelmege yasaq etildi. Aprelniñ 22-de qırımtatarlarnıñ lideri, Ukraina halq deputatı Mustafa Cemilevge Qırımğa kelmege yasaq ettiler.
