Ankara qırımtatarlarnıñ medeniyet ve yardımlaşuv merkezi Qırım musulmanları Diniy idaresinen beraber yardımğa muhtac olğan qırımtatarlar ailelerine qol tutuv boyunca er yıl ötkerilgen hayriye aktsiyasını başladı, dep haber ete QMDİ matbuat hızmeti.
Mubarek Ramazan ayı devamında hayriye aktsiya üç yıldan berli ötkerile. Aktsiya çerçivesinde yardımğa muhtac olğan qorantalarğa aşayt mahsulatı berile. Bu sene yardım olaraq kürpe, makaron, yağ, zeytun, arap hurması, çay, qave, tatlı ve ilâhre tarqatılar.
Keçken sene aktsiya Canköy, Qurman, Saq, Aqmescit ve İçki rayonları, Yedi-Quyu qasabası, Keriç ve Kezlev şeerlerini qavrap alğan edi.
Bu sene Qarasuvbazar, İslâm-Terek, Kefe, Or Qapu, Ermeni-Bazar, Curçı, Aq-Şeyh, Aqyar, Sudaq, Aqmeçit ve Yaltada yardımğa muhtac olğan qırımtatar ailelerine yardım köstermege planlaştıralar.
Hayriye aktsiyanıñ birinci basamağında 200 qorantağa yardım etmege niyetleneler. Aktsiyanı Ramazan ayınıñ soñuna qadar devam etmege planlaştıralar.
