İşğal etilgen Qırım ve üç aydan berli Rusiye boyevikleri tarafından çekiştirilgen Donetskten mecburen köçip kelgenler içün ükümet saytı çalışıp başladı, dep haber ete TSN.
«Köçip kelgenler içün vpo.gov.ua ükümet saytı çalışıp başladı. Anda telefon nomeraları ve diger müim malümat bar», – dep yazdı Facebook saifesiñde halq deputatı ve Donetsk ve Lugansk vilâyetlerinde zıddiyetni barışıq usullarnen al etüv boyunca prezidentniñ vekâletli vekili İrina Geraşçenko.
Saytta köçip kelgenler içün mesken qıdıruv bölükleri, kontakt adresleri ve telefonlar, qanunlar, haberler mevcut.
Mında er bir regionda qaçaqlar içün koordinatsion ştablarınıñ kontakt telefonları berile. Saytnı Ukraina regional inkişafı, qurucılıq ve mesken-kommunal hocalıq Nazirligi baqa.
İyün soñunda Ukraina içinde köçip kelgenlerniñ sayısı aman-aman 49 biñ insannı teşkil etti, ve er daim ep arta, dep haber etti BMT Aqrusiye, Moldova ve Ukraina qaçaqlarınıñ aq-uquqları boyunca yuqarı komissar İdaresiniñ regional vekili Oldrih Andrisek.
İyünniñ 17-de Ukraina parlamenti «İşğal etilgen territoriya aqqında» qanunğa Qırımdan köçip kelgenlerniñ qıtada bulunmasını qolaylaştırğan deñişmeler kirsetti. Yaramadanı terk etmege mecbur olğan qırımlılar qolay-qolay qayd etile bileler. Olarnıñ biznesni ğayrıdan qayd etmege, em de emek ve tibbiyetnen bağlı bir sıra problemlerni al etmege imkânları olacaq. Bundan ğayrı, parlament tasdıqlağan yañılıqlarğa köre, işğal etilgen territoriyadan abituriyentler ukrain aliy yurtlarında imtiyaz alacaqlar.
