Qırımtatar Milliy Meclisiniñ azası Ali Hamzin emin ki, cumaertesi künü, iyülniñ 5-de, «Rossiya 1» telekanalında Mustafa Cemilev aqqında kösterilgen film müellifleri eñ evelâ Rusiye Federatsiyasınıñ prezidenti Vladimir Putinniñ adı-sanına zarar ketirdiler.
Bunı o, Qırım.Aqiqat mühbirine bildirdi.
«Er bir reberniñ etrafında olğanı kibi, onıñ (Putinniñ – muarrir) etrafında da belli bir adamlar bar. Menimce, bu film prezidentniñ özüne ait. Ne içün? Çünki anda Mustafa ağanı dolandırıcı, hırsız dep adladılar. Ve biz şimdi bu filmniñ müellifleri yañı bir şeyni aydınlattılar, dep tüşünmek kerek ekenmiz ve ğarip Vladimir Putin mart ayında telefon subetinde Mustafa ağa <…> dep muracaat etkende, bir şey bilmegen eken», – dep tüşüne Meclis vekili.
Ali Hamzinniñ fikirince, «Mustafa Cemilevniñ gizli ayatı» filminiñ müellifleri, eñ evelâ, Putinniñ adı-sanını yamanladılar.
«Bu Şarqtaki vaziyetnen bağlı, – dep qoşa Qırımtatar Milliy Meclisiniñ azası. – Şimdi anda bir çoq insan vaziyet kerginligini añlağan Putinniñ mevamınen memnün degil. O, Federatsiya Şurasını Ukrainağa ordu kirsetilmesi aqqında qanunnı lâğu etmege çağırdı, o, bazı bir adımlarnı ata ki, artıq onıñ etrafında olğan bazı adamlar bile Putinni begenmey. Onıñ içün olar Cemilev vastasınen Putin tarafına leke attılar. Mustafa ağa ise öyle de Mustafa ağa olıp qaldı».
«Rossiya 1» telekanalı qırımtatarlarnıñ milliy lideri, Ukraina halq deputatı Mustafa Cemilev aqqında «Mustafa Cemilevniñ gizli ayatı» filmini çıqardı ve kösterdi. Film treylerine köre, film müellifleri Mustafa Cemilevniñ «gizli ayatı» aqqında «Qırım Devlet şurasınıñ» deputatı, Regionlar firqası cedveli boyunca Qırım parlamentine saylanğan Edip Gafarov, Qırım «baş naziriniñ muavini» Ruslan Balbek, «Milli Firqa» teşkilâtınıñ lideri Vasvi Abduraimov, em de Qırım «prokurorı» Natalya Poklonskaya ile subetleşeler.
