Qırımda ukrain ve ingliz yazılarınen yol işaretlerini deñiştirmek içün zarur olğan paranı sayıp çıqtılar. Buña 52 million ruble lâzim (17 mln. grn. ziyade).
Bunı Qırım «maliye naziri» Vladimir Levandovskiy iyülniñ 8-de, Qırım «parlamenti» prezidiumınıñ toplaşuvında bildirdi, dep haber ete Qırım.Aqiqat mühbiri.
«Vladimir Petroviç, bir ricam bar, Devlet şurası reisiniñ yol işaretleri adlarınıñ deñiştirilmesi boyunca programmanı amelge keçirüv avalesi mevcut: para belgilendi, maliye etüv tertibi belgilendi, iş tertibi bile belgilendi, mümkün olsa, programmanı tezleştirmek içün sessiyağa deñişmeler kirsetilmesini (Qırım bücetine – muarrir) esapqa alıñız», – dep rica etti Levandovskiyge Qırım «parlamentinde» iqtisadiy, bücet-maliye ve yatırım siyaseti boyunca daimiy komissiyasınıñ yolbaşçısı Vitaliy Nahlupin.
«Bu mesele bizim içün siyaset ceetten pek müim. Printsip meselesi. Bizge bu yönelişte areket etmek kerek», – dep razı oldı onıñnen Qırım «spikeri» Vladimir Konstantinov.
Levandovskiyniñ bildirgenine köre, qayd etilgen para ile mektüp Qırım «baş naziri» Sergey Aksönovnıñ masası üstünde yata. Bugün bu mesele boyunca cevap olmalı.
İyünniñ 24-de Qırım «ükümetiniñ» toplaşuvında Vladimir Konstantinov memurlarğa avgust ayına qadar yarımadada ukrain ve ingliz tillerinde yazılğan yol işaretleriniñ sayısını eksiltmege teklif etti.
