Bazarertesi künü, iyülniñ 7-de, Qırımtatar Milliy Meclisiniñ reisi Refat Çubarov ve qırımtatarlarnıñ milliy lideri, Ukraina halq deputatı Mustafa Cemilev Türkiyede bulundılar.
Bunı Türkiye tış işler nazirligi bildire, dep haber ete QHA agentligi.
Ankarada olarnıñ Türkiye Cumhuriyetiniñ tış işler naziri Ahmet Davutoğlu ile qapalı körüşüvi olıp keçti.
Körüşüvden soñ Türkiye tış işler nazirliginiñ yolbaşçısı qırımtatar halqını qorquzacaq olğan er kesni olarğa nisbeten öz siyasetini deñiştirmege çağırdı.
Tış işler nazirligi Çubarovnıñ Qırımğa kiriş yasağını da takbih etti.
«Qırımtatarlar qırımtatar halqınıñ lideri Mustafa Cemilevniñ ve Qırımtatar Milliy Meclis reisi Refat Çubarovnıñ Qırımğa kiriş yasağınıñ lâğu etilmesini bekleyler. Bizler qırımtatar halqına munasebetini deñiştirmege çağıramız, – dep aytalar tış işler nazirliginde. – Bizler eminmiz, Meclis yolbaşçılığında qırımtatar halqı bu qıyın devirni birlik-beraberlikte keçer. Barışıq, demokratik ve uquq yolunen bu künlerni keçmişte qaldıracaq. Er daim olğanı kibi Türkiye qırımtatarlarnen beraber olacaq».
Bundan evel bildirilgeni kibi, Geniçsekten qaytqan Meclis reisi Refat Çubarovnı Qırımğa kirsetmediler. Oña Rusiyege 5 yıl devamında kelmege yasaq etildi.
Ukraina tış işler nazirligi bunıñ kibi areketlerni takbih etti.
Qırım «baş naziri» Sergey Aksönov jurnalistlerge bergen malümatqa köre, Çubarovnıñ yarımadağa kiriş yasağı «onıñ Qırımda milletlerara zıddiyet olması içün faaliyetinen» bağlı.
