Soñki aylarda qırımtatarlar içün qıyın olğan vaqiyalar sıq-sıq milletimizni raatsızladı. Bularnıñ arasında Qırımnıñ yañı akemiyetinde vazıfelerde insanlarnıñ deñişmeleri, Meclis bölünmesine sebep olğan areketler, halqımıznıñ liderine Qırımğa kiriş yasağı, narazılıq aktsiyalarnıñ keçirmesinde çeşit türlü kederler ve sıñırlar, cezalar, umumiy tedbirler keçirmesine manialar, matem mitingimizniñ yasağı, Milliy Meclis reisiniñ Qırımğa yiberilmemesi.
Şu arada bir sual meydanğa kele - neler yapayıq? Şuralar ve toplaşuvlarnı keçirgen ikmetli liderlerimiz yanımızda olmağanda nasıl çalışayıq? Şahsen men eki doğru çareni körem.
Birinciden, Ornıñ obir tarafında qalğan halqımıznıñ milliy liderlerimizge bus-bütünley destegini köstermektir. Olarğa qoltutuvımız tamamen er qırımtatarnıñ iştiragi ile ve körünikli olmaq kerek.
Ekinciden, yapqan işimizni devam etmek kerekmiz. Şimdi yapqanımız projelerni ilerede de eñ faal sürette ve büyuk ğayretnen amel etişimiz kerek.
Maarif saasında terdbirlerni keçirecek olsañız - eki qat daa ziyade keçirmelisiz. Bir deñişmelerge ketirecek yalıñız faaliyetlerniñ yükseltmesi, er biriniñ ve er saada faaliyetini daa da yüksek derecede yapılmasıdır. Diniy cemiyetke sadaqa berecek olsañnız - eki qat ziyade para beriñiz, em de qoluñızdan kelgen işni yapıñız. Er biirmiz evelde yapıp olamağanını bu künlerde amelge keçirip qoysun.
Keliñiz ne olğanını şimdi talil eteyik. Kelmeşekler azatsever milletimizniñ bütün yapqan areketlerini azarmaq areket eteler. Böyle yapqanlarınıñ sebebi - halqımız belli bir daimiy seviyede faaliyet köstergeninden razı olmadılar. Onıñ içün halqnı ve halq liderlerini ayırdılar. Keliñiz hayırlı işimizge bergen küçümizni eki qat yükseltip kelmeşeklerniñ işini bozayıq. Faaliyetimizniñ azarmasını beklegenlerge amellerni arttırğanımıznı köstereyik.
Evelden milliy gazetalarnı oqumağanıñız alda - özüñiz abune oluñız ve soylarnıñ da bir qorantanı abune etiñiz. Milliy mecmualar da yardımıñızğa muhtac. Eviñizde Quran olmağanı alda - onu satın alıñız ve evlâtlarıñıznı tecvid kurslarına beriñiz. İftar keçirmesinde yardım etkeniñizde kelip tek el yardımını degil, arabañıznı da bu işke teklif etiñiz. Maaleñiznde bir özü qalğan ihtiyar bar ise - qorantañıznıñ küçüklerini qartnıñ azbarında yardımğa yollañız ve ihtiyarnıñ özü sıq davet etilgen musafiriñiz olsun.
Hayırlı amellerni eki qat ziyade ve sıqça yapıñız, ve neticede milletimiz hayırlı künlerni altı qat tezçe körecek.
Asan Emir-Sale, Qırımlı bloger
«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün