Meclis reisi Refat Çubarovğa Qırımğa kelmege yasaq etilgeni sebebinden, qırımtatarlar narazılıq aktsiyalarına çıqmaycaqlar. Bunı Qırım.Aqiqat saytına Meclis reisiniñ muavini Nariman Celâl Meclis prezidiumnıñ toplaşuvından soñ bildirdi.
Qırım.Aqiqat bildirgeni kibi, Meclisniñ iyül 4- 5 künleri Geniçsekte ötkergen toplaşuvda aprel 1 künü 2014 senesi Meclisniñ eki vekilini akimiyetten keri qaytarmaq qararı alınğan edi.«Bizim vazifemiz – Meclisniñ yarımadadan tış ötkerilgen toplaşuvda qabul etilgen qararlarnı eda etmektir», – dedi Nariman Celâl.
«Bu, akimiyet ile işbirligimiz qrulmağanını numayış etken siyasiy bir delil. Biz, Nazirler Şurası ve «parlament» ile yapmağa tırışqan añlaşmalar yapılmadı», – dedi Nariman Celâl.
Aynı zamanda, Meclis vekillerine vazifelerni terk etmege tevsiye etkenini qayd etti. Soñki qararnı memurlar özleri almaları kerekler.
Hatırlatamız, «baş nazir muavini» vazifesinden Lenur İslâmovnıñ işten boşatılğanından soñ, Meclis vekillerinden tek Cumhuriyet milletler komitetiniñ reisi Zaur Smirnov qalmaqta.
Bundan evel, bildirilgeni kibi, Geniçsekten qaytqan Meclis reisi Refat Çubarovnı Qırımğa yibermediler. Oña Rusiyege 5 yıl devamında kelmege yasaq etildi. Bundan evel, Ukraina halq deputatı Mustafa Cemilevge yarımadağa 5 yılğa yol kesildi.
