Rusiye baş naziri Dmitriy Medvedev «Qırım cumhuriyeti ve Aqyar şeerinde mahsus iqtisadiy zonası aqqında» qanun leyhası boyunca toplaşuvda iştirak etecek.
Medvedev öz muaivni Dmitriy Kozakqa bir afta içinde işbu tedbirniñ azırlığını yekünlemege avale etti, dep bildire Qırımnıñ öz başına ilân etilgen akimiyetiniñ «ruporı» «Krıminform».
İşbu qanun leyhasını Qırım işleri boyunca Rusiye Nazirligi İqtisadiy inkişaf ve ticaret Nazirligi ile birlikte işlep çıqara. Devlet dumasına bu vesiqa küzde kirsetile bilecek.
Qırım işleri boyunca nazir Oleg Savelyevniñ sözlerine köre, vesiqada tek bergi ve gümrük imtiazları aqqında degil de, memuriy rejimler aqqında da söz yürsetilecek.
«Biz eñ dedil ğayelerni ve dünyanıñ eñ eyi ameliyatını qullanmağa azırmız», – dedi Savelyev.
2014 senesi mart 16 künü Qırım ve Aqyarda yarımadanıñ statusı aqqında «referendum» keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ bunı tanımadı.
