Qırımnıñ öz başına tayin etilgen baş naziri Sergey Aksönov sentâbr 14 kününe belgilengen «Cumhuriyet Devlet şurası» saylavlarında «Yedinaya Rossiya» Qırım regional bölüginiñ saylav cedveliniñ başında olıp iştirak etecek.
Mütenasip qarar iyül 7 künü firqanıñ regional bolügi konferentsiyasında gizli rey berüv ile qabul etildi, dep bildire Qırım «akimiyeti»ne yaqın olğan Krıminform saytı.
Cedveliniñ birinci beşligine Qırım «spikeri» Vladimir Konstantinov, «spiker muavini» Remzi İlyasov, Qırımnıñ qanun çıqarıcı akimiyetinden Rusiye Federatsiya Şurasınıñ azası Sergey Tsekov ve «spiker muavini» Konstantin Baharev kirdi.
Umumen cedvelde 75 namzet bar.
Qırım «parlamentiniñ» «spiker muavini» Remzi İlyasov qırımtatar milliy Meclisiniñ saylavlarnı boykot etmege qararına baqmadan, 2014 senesi sentâbr 14 künü keçirilecek saylavlarğa firqa cedvelleri boyunca qoşulmağa niyetindedir.
Remzi İlyasov al-azırda «spiker muavini» vazifesini qırımtatar milliy Meclisi azalığınen ve qırımtatarlarnıñ milliy parlamenti – Qurultay azası mandatı ile birleştire.
İlyasov Meclisniñ resmiy mevamına qarşı çıqmaq qararı sebebinden milliy tertibatlarda temsilciligini coya bilecegini de közde tuta.
