Link açıqlığı

Tbiliside 87 yaşında olğan Gürcistannıñ sabıq prezidenti Eduard Şevardnadze vefat etti, dep bildirdi bazarertesi künü Rusiye matbuat vastaları. Şevardnadzeniñ vefatını siyasetçiniñ ailesinden qaynaq tasdiqladı, dep haber ete Azatlıq Radiosı.

Eduard Şevardnadze Mihail Gorbaçövnıñ ğayrıdan quruv ve halqara kerginlikniñ eksiltüv siyasetinde safdaşı edi. 1991 senesi dekabr ayında Belovejsk añlaşmalarını ve SSSR dağıtuvını tanığan birinci sovet yolbaşçılarından oldı.

1995 senesi noyabr ayında Şevardnadze Gürcistanda prezident saylavlarında ğalebe qazandı. 2000 sene kene de şu vazifege saylanıldı.

2003 senesi noyabrde Gürcistanda olıp keçken «Gül inqidâbı» neticesinde Şevardnadzege vazifelerinden vazgeçmege teklif etildi. Gürcistan yolbaşçısınıñ memlekette fevqulâde vaziyetni kirsetmege teklifi parlament tarafından alğışlanılmadı, bundan soñra Şevardnadze istifağa ketti.

XS
SM
MD
LG