Qırım, Donbass kibi Ukrainadır, dedi Lb.ua neşirine Aleksandr Yanukoviç – Ukrainanıñ sabıq prezidenti Viktor Yanukoviçniñ büyük oğlu.
«Ukraina yekâne olmalı, başqa fikrim yoq», – dep cevap berdi o jurnalistniñ Qırım Rusiye ya da Ukrainanıñ olğanı aqqında sualine.
Bundan da ğayrı, o, Rusiye Qırım ile sıñırnı lâğu etkenine qadar işğal olunğan Qırımda bulunğanını haber etti.
Onıñ sözlerine köre, yarımadağa o, Donetskte qanunsızlıq başlağanından soñra, ailesi ile kelgen edi.
«Qarar tez alındı. Eki saat içinde çıqıp kettik. Donetskten Qırımğace mesafe büyük degil»,– dedi o.
Bunıñ ile Yanukoviçniñ oğlu şunı da qayd etti ki, Qırımğa o, babasız ketti ve olar o vaqıt körüşmediler.
«Anda ne müddet devamında bulundıq, aqlımda degil. Bir aydan ziyade olmalı. Qırım ve Rusiye Federatsiyası arasında sıñırlar olmağanından soñra, Moskvağa köçtim», – dedi A.Yanukoviç. – Qırımda vaziyet kergin olğanı içün Moskvada yaşağan dostlarıma ketmege qarar aldım».
Fevral ayında Ukraina içki işler nаzirliginiñ başı vazifelerini eda etken Arsen Avakov Viktor Yanukoviç soñki sefer Aqyarda Balıqlava rayonında körüngenini bildirdi. Onıñ sözlerine köre, oña Qırımdan Rusiyege qaçmağa yardım etkenler.
Bundan soñ Viktor Yanukoviç qıdıruvğa ilân etildi.
