Rusiye Federatsyasınıñ Devlet Şurası soñki zamanlarda ala bilecegi eñ müşkül sıñırlav qanunnı qabul etti.
İyülniñ 1nde RF Devlet Şurası «Şahsiy bilgiler» aqta qanunına deñişmelerni birinci oquvda qabul etip, bir afta keçmeden, iyulniñ 4nde ekinci ve soñki olğan üçünci oquvlarda onı tasdiqlap tolusınen qabul etti.
O deñişmelerge köre 2016 sentabrniñ 1-den Rusie vatandaşlarnıñ şahsiy malümatını çetelde olğan bilgi serverinde yerleşmesi yasaq etilecek.
Bu ne manağa kele? Rusiye vatandaşına ait er bir bilgi yalıñız Rusiye içinde yerleşken servelerde saqlap qalmaq mumkün.
Kelimeniñ qanuniy tarifine köre: «Şahsiy bilgiler olaraq, ya tam doğru ya bir vasta ile belli bir ya da belli olacaq bir tabiy şahısqa (yani şahsiy bilgiler subyektine) bağlı er bir malümat sayıla;» (152-FQ, 3 maq., 1 p.)
Olsun poçta adresi ve telefon numarası, ad-soyad, sağlıqqa bağlı türlü bilgiler, ve ya olsun İnternette şahsiy akkauntları, çetel vizlar almasına zarur malümatlar, tranzaktsiyalar, bank esaplarınıñ numaraları, şahsiy tanıtuv numarası, doğma tarihı ya da pasport bilgileri - bularnıñ episini artıq yalıñız Rusie territoriyasında saqlap qalmaq mumkün. İnternetke kirsetken malümat da bu cumleden.
Online servislerde ve forumlarda regestre etmek çoqusı alda mümkün olmayacaq, çünki birinciden akkaunt Rusiye vatandaşlarınıñ birine ait olacaq, ekinciden, akkaunt verifikatsiyası zemaneviy usulları şahsiy bilgilerge muhtaclar. Esasen İnternetnen bağlı areketlerniñ çoqusı artıq yapılamaz.
Rusie vatandaşı böyle areketlerden marum etilecek:
Çetelden bir türlü sımarışlar ve alış-verişler
facebookmı olsun, Googlemı olsun bir türlü halqara içtimaiy ağ qullanması,
AdSence kibi servislerniñ bir türlü qullanması
Bir türlü aviabilet sımarışı
Çetelge bir türlü vizalar yapılması
Umumdünya para berüv sistemaları vastasınen bir türlü tranzaktsiya
Musafirhaneni bron etmesi
Bir türlü çetel hosterlerinen añlaşmalar yapılması
Özüni bildirmek şart etken er türlü yabancı servisler
Bir türlü VPN
Bir türlü çeteldeki şahsiy serverler
Bir türlü Android Play Market ve AppStore kibi servisler
Başqa çare - halqara kompaniyaları öz serverlerini Rusiyede yerleştirip RF vatandaşlarınıñ şahsiy bilgilerni de şe serverlerge keçirmesidir. Ondan ğayrı, qanunnıñ deñişmelerine köre serverler qayerde olğanını akimiyetke bildirmek şart oldı. Qullanıcılar aqqında bilgilerni, devlet hadimlerine kerek olsa açıqlamaq da şart ola. İşte, üzerimizde qara bulutlar asılı tura.
Bu qaidelerni bozğanlarnıñ cedveli tüzilecek. Roskomnadzor qararına köre, mahkemesiz tizilmesiniñ büyük ihtimalı bar. «Cinaetçiler» çeşit sanktsiyalarğa oğrarlar, meselâ saytlarınıñ IP adresi qara cedvelge kirsetilip ban etilecek.
Bu deñişmeler Rusiyedeki aman-aman bütün İnternet biznesini sıñırlayacaq.
Qanunnı bozğan saytlarnıñ episi yasaq etilmesi mümkün
Rusiyede çalışqan halqara şirketlerge basqı olaraq, olarnı er daqiqa qara cedvelge kirsete bilecekler.
Neticede, rusiyelilerni dünya İnternetinden kesip ayıracaqlar. Hatta bir avto ve ya programmanı ögrenmek içün yardım forumında regestre etmege bir türlü çare olmaycaq.
Rusiye vatandaşlarınıñ ayatlarını tolusınen muafaza etme areketleri ile, şubesis ki, apokaliptik, bir çoq fantastik romanlarda tasvir etilgen stsenaryonı amelge keçireler. O romanlarğa köre, insan ömüri akimiyet tarafından kontrol etilecek.
Asan Emir-Sale, Qırımlı bloger
«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün