Meclis, аprel ayında Qırım «akimiyetine» teklif etken namzetlerni teklif etmek qararını lâğu etti. «Qırım nazirler Şurasında» vazifelerni elde etken memurlarğa istifağa ketmege tevsiye etile.
Bu kibi qarar, Geniçeskte iyül 4-5 künleri ötkerilgen Meclis toplaşuvında qabul etildi. Bunı 15 minut saytı bildire.
Meclis reisiniñ muavini Nariman Celâl qararnı izaatladı: «Akimiyet ile iş tutmaq ıntıluvlar neticesiz qaldı, bu sebepten, Meclis aprel ayında, kendi vekillerniñ akimiyette bulunması aqqında qararnı lâğu etti ve bu şahıslarğa vazifelerni boşatmağa tevsiye etildi. Amma, memurlar elbette, özleri qarar alacaqlar».
Toplaşuv devamında, «Qırım Cumhuriyeti Devlet Şurasınıñ» qanunsız olmasınıñ tanıluvı, ve bu sebepten onıñ işinde iştirak etmek imkânsızlığı meselesi de muzakere etildi, amma, Nariman celâlnıñ aytqanına köre, bu aqta qararnı qabul etmek içün ses yetişmedi.
2014 senesi aprel 1 künü Meclis, Qırım «baş nazirniñ birinci muavini» vazifesine ATR kanalınıñ saibi Lenur İslâmovnı, «cumhuriyet milletler komiteti» reisi vazifesine - Meclis reisi muavini Zaur Smirnovnı teklif etken edi.
Mayıs 28 künü «parlament» toplaşuvında Lenur İslâmov «baş nazir muavini» vazifesini eda etken işinden boşatıldı.
Meclisniñ Geniçeskteki toplaşuvında, yılnıñ soñuna qadar, qırımtatarlarnıñ Bütün dünya kongressiniñ ekinci toplaşuvını keçirmek qararı alındı.
Yarımadadan tış keçirilgen Meclis toplaşuvı, reis Refat Çubarovğa Qırımğa 5 yıl içinde kelmege yasaq ile belgilendi.
