Aqımdaki seneniñ soñuna qadar Bütündünya qırımtatarlar kongressiniñ ekinci qurultayı ötkerilecek. Böyle bir qarar iyül 4-5 künleri Herson vilâyetiniñ Geniçeskte olıp keçken Qırımtatar Milliy Meclisiniñ toplaşuvında qabul etildi.
Meclisniñ tış alâqalar bölüginiñ reberi Ali Hamzin Qırım.Aqiqat saytına bergen malümatına köre, Bütündünya qırımtatarlar kongressiniñ (BQK) ekinci qurultayı azırlanması boyunca işçi gruppasınıñ reisdeşleri olaraq qırımtatarlarnıñ lideri Mustafa Cemilev ve Meclis reisi, BQK prezidenti Refat Çubarov tayin etildi.
Hamzinniñ fikirince, Bütündünya qırımtatarlar kongressi Kiyevde ötkerile bile, lâkin onıñ keçirilmesi içün Turkiye ya da Romaniya saylaması da inkâr etilmey.
Qurultaynıñ nevbetteki sessiya sanı aqqında mesele öyle de açıq qala.
«Farqlı fikirler oldı. Sebebi – yalıñız olsun dep ötkermemek. Keçirilmesi kün tertibinde qala, lâkin vaqtı ve sanı belgilenecek», – dep bildirdi Hamzin.
Qırım.Aqiqat bergen malümatına köre, Meclis toplaşuvında Mustafa Cemilev iştirak etti.
