Qırımnıñ öz başına ilân etilgen «akimiyeti» Herson vilâyetiniñ Geniçesk rayonında olıp keçken toplaşuvdan soñ qaytqan Qırımtatar Milliy Meclisiniñ reisi Refat Çubarovnı Qırımğa kirsetmedi.
Qırım.Aqiqat mühbiriniñ malümatına köre, Qırımnıñ öz başına ilân etilgen «prokurorı» Natalya Poklonskaya Çubarovğa kiriş yasağını seslendirdi.
Meclis reisi ise bu qararnı devlet qırımtatar tilinde oqumağa talap etti (öz başına ilân etilgen Qırım Cumhuriyetiniñ yañı Anayasasına binaen – muarrir). Poklonskaya razı olmadı.
Qırım.Aqiqat mühbiri «Çonğar» kiriş noqtasında «sıñırda», Çubarovnı toqtatqan yerde, 6 avtobus ve 5 avtozak bar olğanını qayd etti. OMON ve arbiyler çoqlaşa.
Qayd etmeli ki, Meclisniñ diger azalarını «sıñırdan» keçirdiler.
Qırım «akimiyetine» yaqın olğan Krıminform saytınıñ malümatına köre, Rusiye Çubarovğa 5 yıl devamında Qırımğa kelmege yasaq etti.
Bundan evel qırımtatar halqınıñ lideri Mustafa Cemilev cumhuriyet «akimiyeti» Refat Çubarovnı Qırımğa kirsetmese kerek, dep bildirgen edi.
