Qırımtatar halqınıñ lideri Mustafa Cemilevniñ fikirince, cumhuriyet «akimiyeti» Meclis reisi Refat Çubarovğa Qırımğa kelmege yasaq ete bileler.
Bunı Cemilev Herson vilâyetiniñ Geniçeskte ötkerilgen Meclis toplaşuvı ögüne jurnalistlerge bildirdi, dep haber ete Qırım.Aqiqat mühbiri.
«Menim tam bir malümatıma köre, Qırımtatar Milliy Meclisiniñ reisi Refat Çubarovnı Qırımğa keri kirsetmemek meselesi baqılğan edi», – dep bildirdi Cemilev.
Lâkin, halq deputatınıñ aytqanına köre, Qırım «akimiyeti» Meclis reisini deñiştirmek maqsadında onı içinden bölecek olalar.
«Bugünde-bugün bu qararnı qabul etmediler ve bunı yapmaycaqlar, başta kollaboratsionist olmağa azır olğanlarnı toplap, içinden devrim yapacaq olalar, yani Qırımtatar Milliy Meclisiniñ yañı reisi saylansın, ve Refat Çubarovnıñ yerine qoqla kelmesini isteyler», – dep ayttı Cemilev.
«Şunı aytmaq kerek ki, bu yañlış bir ümüt, çünki temsil organ temsil organ olıp qala, ve anda bir qoqla olsa, Meclis işini toqtatacaq ya da faaliyetni başqa bir şekilde alıp baracaq», – dep qayd etti Cemilev.
Malüm olğanı kibi, Mustafa Cemilevge beş yıl devamında Qırımğa kelmege yasaq etildi.
