Yaqında yerli «akimiyet»niñ «baş nazir muavini» vazifesinden istifağa çıqqan Qırım «parlamenti» deputatı tevqif etilgeni aqqında laflarnı red ete.
Qırımda içtimaiy ağlarda akimiyet qaynaqlarından çıqqan sabıq memurlarnıñ apis cezaları aqqında laflarnı muzakere eteler. Şu cümleden, söz al-azırda öz başına tayin etilgen baş nazirniñ keñeşçisi olğan Rustam Temirgaliyev ve Qırımnıñ «sabıq sağlıq saqlav naziri» ve onıñ muavinleri aqta kete.
Faqat Temirgaliyevniñ özü bu malümattan şaşıp qaldı. «Sizden bunı ilk sefer eşitem ve işbu malümatnı nasıl izaatlamaq da bilmeyim. Doğru degil, yalandır», – dedi Qırım.Aqiqatqa telefon vastası ile Temirgaliyev.
Bu kibi öşeklerni tarqatmaq kimge elverişli olğanını Temirgaliyev aytıp olamadı ve al-azırda Aqmescitte bulunğanını ayttı.
Qırım.Aqiqat «Nazirler şurasınıñ» sabıq memurlarını apis etmek içün esasları aqqında yerli uquq qorçalayıcı organlarnıñ hadimlerinden ögrenmege tırıştı. Faqat olar bu malümatnı ne de tasdiqlaylar, ne de red eteler. «Bu malümatnı siz yalıñız informatsion istek ile ala bilesiñiz», – dep aytalar Qırımnıñ «içki işler nazirliginde».
İyün 11 künü Qırım «parlamenti» Rustam Temirgaliyevniñ Qırım «baş nazir muavini» vazifesinden istifasına qol tuttı. Qırım siyasetşınası Aleksandr Formançuk aytqanı kibi, Temirgaliyevniñ istifası Rusiyeniñ siyaseti ile bağlı.
