Link açıqlığı

Qırım-Ukraina dep tüşüngenler üç yıllıq mecburiy işlerge oğratıla bile


Rusiye Devlet duması deputatları memleketniñ topraq bütünliginiñ bozuluvına çağırğanlarnıñ cezasını daa da ciddiy etti.

İTAR-TASS bergen malümatına köre, iyül 4 künü Devlet duması ekinci ve üçünci oquvda separatizmge çağıruvlar içün mesülietni arttıracaq deñişüvlerni qabul etti.

Federatsiya Şurasınıñ azası Andrey Klişas teşebbüsine köre, memleketniñ topraq bütünliginiñ bozuluvına çağıruvlar içün yañı ceza kirsetilecek. Söz üç yıllıq mecburiy işler ya da dört-altı aylıq apis cezası aqta kete.

Bundan da ğayrı apis cezasınıñ müddetini üç yıldan dört yılğace arttırmağa teklif eteler.

Aynı bu areketlerniñ matbuat vastaları ya da internetten yapıluvı içün insan eda etken vazifelerinden üç yılğace boşatıla bile, – qayd ete neşir .

2014 senesi mart 16 künü Qırım ve Aqyarda yarımadanıñ statusı aqqında «referendum» keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ bunı tanımadı.

XS
SM
MD
LG