Link açıqlığı

Saatnıñ esas haberi

Qırımtatar milliy Meclisiniñ Geniçeskte ötkerilecek toplaşuvı yarı gecege qadar devam etecek


Qırımtatar milliy Meclisiniñ Herson vilâyeti Geniçeskte ötkerilecek toplaşuvı iyül 4 künü aqşamına yaqın başlanacaq.

Qırım.Aqiqat mühbiri bergen malümatına köre, toplaşuv iftardan soñ açılacaq.

Evel Meclis işine saat 15:00 başlamaq kerek edi, amma qırımtatarlarnıñ milliy yetekçisi, Ukraina halq deputatı Mustafa Cemilev keç qalğanı sebebinden toplaşuvnı aqşam vaqtında keçirmege qarar alındı.

İftar saat 20:00 (Kiyev vaqtı boyunca) olacağı içün Meclis azaları toplaşuv yarı gecege qadar devam ete bilecegini tahmin eteler.

Bundan evel, saat 19:30, toplaşuv iştirakçilerini qarşılaycaq icadiy milliy taqımlarnıñ çıqışları planlaştırıla.

Meclis azaları toplaşuv keçecek yerli «Komfortnıy» musafirhanesinde yerleşecekler. Mında endi Meclis reisi Refat Çubarov, muavinleri Ahtem Çiygoz, Nariman Celâl kelip çıqtı. İştirakçilerniñ daa bir qısmı yolda ketmekteler. Kiyevden keleyatqan Mustafa Cemilev de şu cümleden.

Qırım.Aqiqat mühbiriniñ sözlerine köre, Meclisniñ bazı bir azalarını sıñırda federal hızmetiniñ hadimleri çağırıp, olarnen «tenbileyici subetlerni» keçire edi.

Qırımtatar milliy Meclisiniñ toplaşuvı Geniçeskte iyül 4 ve 5 künleri ötkerilecek. Kün tertibinde 2014 senesi mart 29 künü qırımtatar milliy Qurultayı VI-ncı çağıruvnıñ azaları tarafından qabul etilgen «Qırımtatarlarnıñ Vatanda öz kelecegini belgilemek aqqı» qararınıñ yerine ketirilüv ketişatı ve nevbetteki Qurultaynıñ ötkerilüv tarihı ve kün tertibi ile bağlı meseleler baqılacaq.

XS
SM
MD
LG