Rusiye prezidenti Vladimir Putin Ekinci cian cenki devamında repressiyalarğa oğratılğan Qırım halqlarnıñ aqlanuvı boyunca programmasınıñ daa keñiş olması mümkün, dep ayttı.
Bunı o iyül 3 künü milltlerara munasebetler boyunca toplaşuvda bildirdi.
Kremlniñ saytında bildirilgeni kibi, bu meseleni Rusiyede yunanlarnıñ Federal milliy medeniy cumhuriyetniñ prezidenti İvan Savvidi köterdi.
«Biz elbette ki, bu mesellerni baqacaqmız. Qırımda ulu Vatan cenkinden evel Qırımda yaşağan ve repressiyalarğa oğratılğan halqlarnıñ aqlanuvı boyunca fermanğa diqqat ayırğanız içün sağ oluñız. Bu em yunanlar, em qırımtatarlar, em de nemselerge ait ferman. Amma, avdetnen bağlı meselelerimiz bar, - maliye cietinden destegimiz qazna imkânlarınen sıñırlana», - dedi Putin.
Aytqanına köre, bu kibi programmanı endi azırladılar ve yaqın kelecekte onı qabul eteceklerdir.
«Asılında, qırımtatarlarnen körüşkende de, biz keñişletüv aqqında laqırdı ekten edik, amma, kerçek aytsam ilk adımlar öyle olmalıdırlar ki, insanlar Rusiye olarnıñ aqlanuv boyunca mesellerniñ çezilüvine qoşulğanını is etmeliler. Em de bu, tek siyasiy, maneviy degil de, içtimaiy- iqtisadiy aqlanuv olmalı», - dep qayd etti Putin.
Rusiye prezidenti Vladimir Putin aprel ayında sovet devirinde repressiyalardan çekişken halqlarnıñ aqlanuvı boyunca qararnı imzaldı. Qırımtatar halqı Meclisi bu fermannı teñqid etti.
Meclis reisi Refat Çubarovnıñ fikirince, fermanda, qanunsız şekilde yoq etilgen qırımtatarlarnıñ milliy-territorial cumhuriyetiniñ tiklenüvi aqqında iç bir şey yazılmağan.
