Qırımda insan aqlarınıñ ve hususan, qırımtatar aq-uquqlarınıñ sıñırlanuvı Ukrain akimiyetiniñ diqqatını celp ete.
Bunı Ukraina tış işler naziriniñ muavini Daniil Lubkivskiy bildirdi.
«Rusiye numayışları serbest keçirilgen zaman, Matem künü ve qırımtatar Bayraq künü yasaq etilgen edi. Bu ksenofobiya ve şovinizmdir. Bütün dünya rus devlet imperializmniñ havflı olğanını añlamaq kerek», - dedi o.
Bunen beraber, Lubkivskiy FHH (FSB) tarafından yaqalanğan Oleg Sentsov, Aleksey Çerniy, Gennadiy Afanasyev, Aleksandr Kolçenko ve diger siyasiy mabüslerni añdı.
«Rusiye akimiyetiniñ ukrain vatandaşlarını taqip etüvi pek raatsızlay. Onlarnen adamlar Kremlniñ mabüslerine çevirildiler. Ukraina Rusiyeden vatandaşlarını azat etmege talap ete», - dep qayd etti nazir muavini.
Onıñ malümatına köre, Ukrainanıñ bir sıra resmiy muracaatları öyle de cevapsız qaldı.
«Bizim vatandaşlarımıznıñ qorçalav meselesinde, rusiyeli tarafnıñ qaba nutuqları bütün dünya cemaatçılıq içün bir işarettir, - dedi Lubkovskiy. – Bütün dünya cemaatçılığını qabaatsız ukrainlilerniñ azat etmek talaplarını devam ettirmege çağıramız».
Qırım Rusiye tarafından işğal etilgen soñ, qırımtatarlarğa milliy tedbirlerni keçirmege yasaq eteler. Sürgünlikniñ 70 yıllığı arfesinde Qırım baş –naziri Sergey Aksönov kütleviy tedbirlerni keçirmege yasaq etken fermannı imzaladı. Böyleliknen, qırımtatarlar, Ukrainanıñ tarihında birinci kere, matem kününi Aqmescitniñ merkezinde degil de, onıñ çetinde keçirdiler. Tamam bu kibi vaziyet Bayraq künü de yüz berdi.
Mayıs 30 künü Rusiye Federal Havfsızlıq Huzmeti Qırımda «Pravıy sektor» diversion-terroristik teşkilâtınıñ azalarını yaqalağanını bildirdi. Olarnıñ arasında ukrain rejissörı Oleg Sentsov, ve diger teşebbüsçiler Gennadiy Afanasyev, Aleksey Çirniy, Aleksandr Kolçenko apiste bulunmaqtalar, tezden olarnıñ qabaatları da belli olacaq.
FHH bildirgeni kibi, «şeklengenler Qırımda «Pravıy sektor» vekilleri terroristik tedbirlerni azırğanlarını tasdiqlap başladılar».
Ukraina Tış İşler Nazirligi iyün 3 künü Kiyevdeki Rusiye elçihanesine nota yollap, Sentsov ile körüşüvni talap etti.
