Rusiye Federatsiyasında bulunğan Ukraina vatandaşlarını kütleviy sürette sorğuğa çekip başladılar. Taqiqat komitetiniñ hadimleri bildireler ki, bu iş «yasaq etilgen cenk vastaları ve usullarını qullanuv aqqında» cinaiy iş çerçivesinde keçirile, dep haber ete TSN.
Ukraina vatandaşlarına Dnepropetrovsk vilâyet devlet memuriyetiniñ reisi İgor Kolomoyskiy ve Ukraina içki işler naziri Arsen Avakovnıñ faaliyetinen bağlı sualler berile.
Em de arbiy bölüklerniñ yerlerini soraylar, dep yaza neşir.
Ukrainlilerden Ukraina ükümetine şahsiy munasebetleri aqqında da soraylar. Kütleviy haber vastalarınıñ malümatına köre, Rusiye taqiqat organları dört biñ insannen endi subetleştiler.
Bundan evel berilgen malümatqa köre, Rusiye Taqiqat komiteti «Ukrainada tınçlıqsever insanlarğa qarşı cinayetlerni taqiq etüv» mahsus idaresini meydanğa ketirdi.
Moskvanıñ Basman mahkemesi Dnepropetrovsk gübernatorı İgor Kolomoyskiyni «eki ayğa qadar ğıyabiy şekilde apske aluv aqqında» qarar çıqardı.
