İşğal etilgen Keriçte 93000 Rusiye pasportı berildi. Bunı «pasportlarnı berüv noqtasınıñ» yolbaşçısı Sergey Brage matbuat konferentsiyasında bildirdi.
Onıñ aytqanına köre, Keriçniñ 96 000 sakini Rusiye Federatsiyası vatandaşınıñ pasport resmiyleştirilmesi içün vesiqalarını teslim etti, olardan 93 000 kişi pasportnı elde etti.
Keriçte, FMH malümatına köre, tahminen 117 000 saylayıcı bar, onıñ içün Rusiye pasportını aluv meselesi saylavlar arfesinde ğayet aktual ola.
Aqyar «akimiyetiniñ» malümatına köre, şeer sakinleriniñ üçte ekisi Rusiye pasportını aldı. Memurlar bildireler ki, Aqyar saylayıcılarınıñ şeer cedveline 302 biñ insan kirsetildi, olardan 197 biñ kişi Rusiye pasportını elde etti.
Yerli kütleviy haber vastalarınıñ malümatına köre, Rusiye pasportını alğan qırımlılar müür ve imza olmağanını qayd etip başladılar. Böyle etip, olarnıñ kerçek ya da sahte olması büyük şübe doğura.
