2015 senesi Qırım inkişafına 100 milliard ruble sarf etilecek, – dep bildirdi Rusiye Federatsiyasınıñ maliye naziri Anton Siluanov. Nazirniñ aytqanına köre, mında Keriç köpüriniñ masrafları da kire, dep haber ete öz başına ilân etilgen Qırım «akimiyetine» yaqın olğan «Krıminform» saytı.
Nazirniñ bildirgenine köre, Qırım inkişaf programmasınıñ maliye miqdarı, ilk tahminlerge köre, 100 mlrd rubleni teşkil etecek.
Siluanov qayd etti ki, Qırım ve Aqyar qol tutuvınıñ esas yönelişlerini belgilemek kerek.
«Bu infrastruktura, yollar, energetika, suv teminlevi... Bu esas yönelişler işbu devlet programması çerçivesinde qol tutuv belgilemesinde eñ müimi olacaqtır», – dep añlattı Rusiye Federatsiyasınıñ maliye naziri.
Onıñ qayd etkenine köre, Qırımnıñ inkişaf programması profil nazirliklerinde baqıla, eñ yaqın vaqıtta ükümette bunıñnen bağlı muşavere ötkerilecek.
Bundan evel Rusiye maliye Naziri Anton Siluanov bergen malümatına köre, paranıñ umumiy miqdarı 2014 senesi içün 240 mlrd. rubleni teşkil ete, 2015 senesi içün – 80 mlrd. ruble.
Aprelniñ 17-de Rusiye prezidenti Vladimir Putin bildirdi ki, Qırım inkişafı boyunca programmalar bücetniñ ğayrıdan baqılmasını talap etmeycek, leyhalar ükümet yedekleri sayesinde ömürge keçirilecek.
