İyülniñ 2-de qırımtatar şairi Refat Çaylaqnıñ «Vatan duyğusınen» kitabı taqdim etildi. Kitapqa vatanperverlik mevzusında şiirler kirdi. Tedbir «İ.Gasprinskiy adına qırımtatar kütüphanesi» Qırım Cumhuriyet Müessisesinde ötkerildi. Kitaphane hadimleri şairniñ ömür ve faaliyeti aqqında sergi ve foto taqdimini azırladılar.
Tedbirde «Maarifçi» qırımtatar birleşmesiniñ Reisi Safure Kacametova, qırımtatar yazıcıları Birliginiñ reisi Riza Fazıl, yazıcı ve şairler – Şeryan Ali, Uriye Edemova, Ablâziz Veliyev, em de milliy arekette dost ve ortaqları olğan Şefiqa Konsul, Fatma Bayraç ve Pevat Zeti iştirak ettiler.
Tedbirni Qırım Muhtar Cumhuriyetinde nam qazanğan artist Rustem Memetov ve №11 gimnaziyasınıñ 11-inci sınıf talebesi Emine Ablayeva yaraştırdılar.
Refat Çaylaq 1938 senesi fevralniñ 13-de Sudaq rayonınıñ Toqluq köyünde dünyağa keldi. Mektepni bitirgen soñ, Taşkent gidromeliorativ tehnikumına oqumağa kirdi. Refat Çaylaqnıñ birinci şiirleri 1967 senesi «Lenin bayrağı» gazetasında bastırıldı.
Şairniñ birinci «Bosağada» şiirler cıyıntığı 1994 senesi Aqmescitte dünya yüzüni kördi. Al-azırda Refat Çaylaqnıñ şiirleri «Yıldız» mecmuası, «Yañı dünya» ve «Qırım» gazetalarında derc oluna. Refat Çaylaq milliy areket iştirakçisi, Qırımtatar halqı II Qurultayınıñ delegatı (1991) ve Ukraina yazıcıları milliy birliginiñ azası ola.
