Link açıqlığı

Qırımda musulmanlar içün muqaddes sayılğan Ramazan ayında camilerde mukabele (Quran oquvı), teravih namazları ve vaazlar keçirile. Bunıñ içün yarımadağa Türkiyeden Quran qıraatı boyunca ocalar keldiler.

Olardan biri Türkiyeden din ocası Abdullah Tekin Qırımğa Türkiye Cumhuriyeti diniy idaresiniñ avalesinen yollanıldı. Bunı Qırım.Aqiqat mühbiri bildire.

Aqmescitniñ merkeziy Kebir camisinde Ramazannıñ birinci kününden başlap, Abdullah Tekin Quran oquy. Türk ocası er kün 1 cuz tamamlay. Ramazannıñ soñuna qadar, yani iyül 28-ne qadar bütün Qurannı oqup bitirmesi niyet etile.

Saat 21.00 vaazlar oqulıp, aqşam namazına qadar devam ete. Teravih namazları yatsı namazından soñ, qılına.

Qırım.Aqiqat mühbirinen laqırdı etkende, Abdullah oca şunı bildirdi: «Men Qırımğa muqaddes Ramazan ayı, qardaş qırımtatar halqına hızmet etmek içün keldim. 30 kün devamında 5 kere namaz, teravih namazlarını qıldırıp, Qurannı añlatacam».

Qırım müftiyatında bildirgenleri kibi, er yıl Türkiyeden mütehassıslar davet etile. Bu sene on oca keldi. Olar, yarımadanıñ çeşit köşelerinde yerleştiler.

Ocalarnıñ bütün masraflarnı Türkiye diniy işler idaresi al etmekte. Diniy tedbirlerge er kes qoşula bile.

Ramazan – musulmanlar içün muqaddes bir aydır. Bu vaqıt içinde musulmanlar kündüzleri namaz, dua etip, Quran oquv, oraza tutalar.

XS
SM
MD
LG