Rusiye tarafı Ukraina ile sıñırda üç halqara avtomobil kiriş noqtasını qapattı ve öz toprağına Ukrainadan boyeviklerni kirsetmemege çalışa, dep bildirdi Ukraina milliy havfsızlıq ve mudafaa şurasınıñ haber merkeziniñ spikeri Andriy Lısenko, dep haber ete Azatlıq Radiosı.
«Şu cümleden, iyül 1 künü Rostov vilâyetinde «Gukovo», «Donetsk», «Novoşahtinsk» halqara avtomobil kiriş noqtaları qapatıldı»,– dey Lısenko.
O, bu kiriş noqtalardan evel boyeviklerniñ serbest keçkenini bildirdi. «Şimdi bu noqtalarda Rusiye tarafı mahsus blokpostlarnı teşkil etti ve olarnı ağır zıhr tehnika ile quvetleştirdi»,– dedi Lısenko.
Onıñ sözlerine köre, işbu kiriş noqtalardan «Ukrainadan qaçmağa istegen silâlı boyeviklerni kirsetmege yasaq oluna».
