Qırımda endi bayağı mesele peyda oldı, olarnıñ miqyası ileride artacaq.
Bunı From-UA internet neşirine Ukrainanıñ birinci prezidenti Leonid Kravçuk bildirdi.
«Rusiye Qırımda idare etip olamaz. Alem Qırım tanılmağan topraq olğanı içün anda barmaycaq. Turizm qapatılır. Rusiye anda oyun evlerini açmağa ya da faişelikni teklif etermi? İnsanlarnı ürmet etmek kerek», – dedi Kravçuk.
Siyasetçi Qırım Rusiyeniñ tarihiy toprağı olğanı aqqında fikirlerni de izaatladı.
«Yalandır, Qırım tek 1783 senesi Rusiyeli oldı, evelden ise Moskva çarlığı edi. Eger de öyle fikir yürsetsek, Türkiye «bu bizim tarihiy toprağımızdır» dep aytır. Qırımtatarlar «biz bu topraqnıñ tamır halqımız, siz ise mında sürip keldiñiz» dese, ne olur? Halq rey berdi, mustaqillikni ber degen laf – aldavdır»,– dedi Kravçuk.
2014 senesi mart 16 künü Qırım ve Aqyarda yarımadanıñ statusı aqqında «referendum» keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ bunı tanımadı.
