Qırım «parlamentiniñ» «spiker muavini» Remzi İlyasov qırımtatar milliy Meclisiniñ saylavlarnı boykot etmege qararına baqmadan, 2014 senesi sentâbr 14 künü keçirilecek saylavlarğa firqa cedvelleri boyunca qoşulmağa niyetindedir.
Bunı İlyasov Qırım.Aqiqat saytına bildirdi.
Onıñ fikrine köre, Meclisniñ qararı birazdan deñişe bilecek.
«Saylavlarda iştirak etmege qarar aldım,– dey siyasetçi. – Prezident Putinniñ fermanı amelge keçirilmesine 15-20 qanun leyhasınıñ qabul etilmesi içün taqımımız ile elimizden kelgenini yaparmız. Eger de bunı becersem, qırımtatar halqı meseleleriniñ çezilmesine isse qoşarım, dep tüşünem».
Remzi İlyasov al-azırda «spiker muavini» vazifesini qırımtatar milliy Meclisi azalığınen ve qırımtatarlarnıñ milliy parlamenti – Qurultay azası mandatı ile birleştire.
İlyasov Meclisniñ resmiy mevamına qarşı çıqmaq qararı sebebinden milliy tertibatlarda temsilciligini coya bilecegini de közde tuta.
«Meni vazifelerimden tek Qurultay boşata bile. Elbette ki, böyle al hoşsuz olur. Men mevamımnı daima açıq aydınlatam ve aytam. Belki de, yañlışam, amma saylavlarda iştiragimiz zaruriy olğanını yalıñız men tüşünmeyim. Böyleliknen biz kimsege qarşı çıqmağanımıznı kösteremiz», – dey İlyasov.
Bunıñ ile o, «Qırım Cumhuriyetiniñ Devlet şurasına» Rusiyeniñ angi siyasiy küçü terkibinde saylanılacağı aqqında izaat bermedi.
«Bunı aytmağa daa vaqıt kelmedi», – dedi o.
Qırımtatar milliy Meclisiniñ nevbetteki toplaşuvınıñ keçirilmesi Hersonda planlaştırıla. Tedbirge qırımtatar milliy yetekçesi Mustafa Cemilevniñ qoşulması beklenile. Rusiye tarafından Qırımnıñ işğalinden soñ yerli «akimiyet» oña yarımadağa kirişini yasaq etti.
Kün tertibi daa belgilene, amma malüm ki, toplaşuvda qırımtatar milliy Qurultayınıñ bazı azalarınıñ Qırımdaki küz saylavlarında iştirak etüv imkâniyeti muzakere etilecektir.
