Sentâbrniñ 1-ne qadar işğal etilgen Qırım mektepleri yañı kitaplarnı alacaqlar. Er bir fen boyunca dersliklerni «Prosveşçeniye» neşriyatı bastırdı, – dep bildirdi iyülniñ 1-de Kazan iş ziyareti vaqtında Rusiye kitaplar birliginiñ prezidenti Sergey Stepaşin.
«Vladimir Putin sentâbrniñ 1-ne qadar Aqyar ve Qırım mektep talebeleri bizim kitaplarımız boyunca oqumasını avale etken edi. Hususan tarih derslikleri. Ukrainada olğan kitaplarda yañlış malümatlar bar. Rusiye kitaplar birligi derslikler meselesini tolusınen al etecek», – dedi Stepaşin.
«Prosveşçeniye» neşriyatınıñ müdir muavini Yelena Niziyenko dedi ki, Qırım içün 2,5 million kitap bastırıldı, – dep haber ete Qırım «ükümetine» yaqın olğan Krıminform saytı.
«Yarın olar mağazğa ketirilecek, ve biz olarnı Qırımğa yollaycaqmız. Bu yük maşinalarından ibaret büyük bir kolonna olacaq. Bastırılğan kitaplar yarımada mektepleri içün yeterlidir. Anda olarnıñ sayısı 600 teşkil ete», – dep ayttı Niziyenko. Onıñ qayd etkenine köre, er bir derslikniñ elektron ilâvesi mevcut.
Berilgen malümatlarğa köre, Rusiye federal bücetinden işğal etilgen Qırım ve Aqyar tasiline üç milliard rubleden ziyade ayırıldı. Para mektep avtobusları, kitaplar, tasil yañılıqları ve ocalarnıñ ihtisas arttırılmasına sarf etilecek.
