«Svoboda» ve «Batkivşçına» fraktsiyaları, em de «Mustaqil avropalı Ukraina» parlament gruppası Donetsk ve Lugansk vilâyetlerinde arbiy vaziyet kirsetilmesiniñ kerekligini qayd eteler, dep haber ete Azatlıq Radiosı.
«Svoboda» fraktsiyasınıñ lideri Oleg Tâgnibok onıñ siyasiy küçü tünevin RNBO ve Ukraina prezidenti Petro Poroşenko tarafından barışıq rejiminiñ toqtatılması aqqında qabul etilgen qararğa qol tutqanını bildirip, arbiy vaziyetni kirsetmek teklifi ne sebepten olmağanını añlap olamağanını ayttı.
«Batkivşçına» fraktsiyasınıñ reberi Serğiy Sobolev qayd etkenine köre, Yuqarı Rada memlekette arbiy vaziyet kirsetilmesine azır.
Onıñ bildirgenine köre, «prezident bunıñnen bağlı buyruqnı qabul etip, onı parlamentke bermeli».
Ukraina şarqındaki vaziyetni al etüv boyunca prezidentniñ vekâletli temsilcisi İrina Geraşçenko, Ukraina prezidenti Ukraina şarqında arbiy vaziyetni kirsetecekmi degen sualge, dos-doğru cevap bermeyip, «ATO ğayrıdan tiklenildi ve bu qararğa em arbiyler, em eali qol tutqanını» bildirdi.
