Qırım «ükümeti» aşayt mahsulatınıñ fiyatlarını teşkerip, soñki afta devamında 9 malınıñ fiyatı eksilgenini bildirdi. Mında Qırım fiyatları Rusiye fiyatlarından qat-qat ucuz olğanını qayd eteler.
«Bugünde-bugün Qırımda içtimaiy ceetten emiyetli olğan 23 aşayt mahsulatınıñ fiyatı Rusiye Federatsiyasınıñ yaqın regionlarındaki fiyatlardan 2-2,5 qat ucuzdır», – dep tekrarlay Qırım «iqtisadiyat inkişafı naziri» Svetlana Verbanıñ aytqanlarını «Nazirler şurasınıñ» matbuat hızmeti.
Qırımnıñ öz başına ilân etilgen baş naziri Sergey Aksönov bildirdi ki, fiyatlar belgilengende, mahsulatnıñ taşıma fiyatı da esapqa alına.
Onıñ malümatına köre, em Ukraina, em de Rusiyeden mahsut taşıması bayağı paalı tura.
Rusiyeniñ Qırım işğalinden soñ yarımadada aşayt mahsulatı ve ilâclar fiyatı, yol parası artıp başladı.
