Frenkistanlı faaliyetçler Sen-Nazer şeerinde Rusiyege «Mistral» desant-vertolöt gemileriniñ satuvına qarşı numayışnı keçirdiler, dep bildire RFI.
Numayışnıñ iştirakçileri Rusiyeniñ Ukrainağa qarşı havflı siyaset aqqında ilân ettiler.
Numayış Rusiyeden «Vladivostok» qurulayatqan gemiler eyyetiniñ kelmesine bağışlana.Miting iştirakçileri geminiñ fonında «Olland, 400 Putin qatilleriniñ ögretüvine – yoq» ve «Olland, Frenkistan şerefi «Mistrallerden» paaladır» degen şiarları ile plakatlarnı açtı. Bundan da ğayrı qollarında Ukraina, Frenkistan ve Avropa birligi bayraqlarını tuta edi.
«Biz Rusiye içün «Mistral»lerni qurğan STX frenkistan şirketi yanında toplanıp, ükümetimizge ve rusiyelilerge narazılığımıznı kösteremiz ve Bretan Qırım olmağanını añlatamız. Böyleliknen, yalıñız ukrain ve frenklerni degil de, RF istilâyi siyasetine lâqayt qalmağan er kesni areketke çağırmağa isteymiz»,– dedi numayışnıñ teşkilâtçılarından biri Bernar Grüa.
Frenkistannıñ ukrain cemaatı temsiliy komitetiniñ prezidenti Natalya Pasternak Frenkistan ükümetini «yüksek tehnologiyanı Avropanıñ eñ qudretli istilâcısına bermemege» çağırdı.
