Qırımlılar Zakarpatyede olğan Ukrainanıñ eñ yüksek noqtası Gоverla dağına bayraqlar ile çıqıp, Ukraina Anayasa Kününi qayd ettiler.
Qırım AvroMaydan teşkilâtçısı Sergiy Kovalskıy öz Facebook saifesinde yazğanı kibi, «Qırım işğalinden soñ insanlar barıp çıqqan Ukrainanıñ er bir regionından keldi».
«Qırım ve Ukraina birlikte olğanını köstermek içün toplandıq. Biz işğalci-memleket bayraqları astında kendi yaşayışımıznı tasavur etmeymiz, şunıñ içün onı qaytarmaq içün er şey yapmağa azırmız», – dedi Kovalskiy.
İyün 28-de, Ukraina Anayasa Kününde, Rusiye tarafından işğal etilgen Qırım sakinleri Qırım.Aqiqat mühbiriniñ Ukrainada nasıl bayram qayd etile degen sualine cevap berip olamadılar.
İşğal etilgen Qırım soqaqlarında devlet bayramı alâmetleri yoq edi. Ukrain timsalini yalıñız qırımtatar milliy Meclisi binasında tapmağa mümkün edi, anda Ukraina bayrağı yelpirey.
