Donetskte «Pervıy kanal» Rusiye telekanalınıñ operatorı Anatoliy Klân elâk oldı. Bunı telekanal saytı ve diger rusiyeli matbuat vastaları bildire, dep haber ete Azatlıq Radiosı.
«Anatoliy Klân mühbir ve ses operatorı ile gece ukrain arbiy qısımına yol aldı. Bunı Donetsk halq cumhuriyetiniñ matbuat hızmeti azırladı»,– dep bildirile «Pervıy kanal»nıñ saytında.
«Matbuat hızmetiniñ» malümatına köre, «Askerlerniñ anaları oğulları ile körüşip, olarnı evge almağa planlaştıra ediler».
Ukrain arbiyleri tarafından kökke işaret raketası yollanılğanından soñ, atışlar eşitildi. Atıştan evel olğan tam tasvirni rusiyeli matbuat vastaları bildirmey.
Twitter qullanıcılarınıñ malümatına köre, Rusiye jurnalistleri ile avtobus dümeni başında «DHC» teşkilâtınıñ işaretleri ile kamuflâjlı erkek buluna edi. Avtobusnıñ diger yolcuları aqqında malümat yoq.
68 yaşında olğan Anatoliy Klân «Pervıy kanal»da 40 yıldan ziyade işley edi.
