Link açıqlığı

Saatnıñ esas haberi

Rosaviatsiya işğal etilgen Qırımdan uçaqlarnı Türkiyege yollamağa azır


Rusiye ava şirketleri Rosaviatsiyanı Aqmescit ava limanından halqara uçuşlarnı musaade etmege rica ete.

Bu aqta Rosaviatsiya terkibiy bölükleri tarafından halqara komissiyalarğa azırlanğan malümatlarında söz kete.

Qırımdan halqara uçuşlarğa musaadeni Aqmescitten aftada beş kere Baku, Yerevan, Taşkent, Duşanbe ve Tаcikistanğa barmağa planlaştırğan «Ural ava yolları» soray. «Groznıy avia» ava şirketi aftada eki kere Qırımdan Yerevan ve Antalyağa ve er künü İstanbulğa barmağa niyetinde.

İTAR-TASS agentliginiñ malümatına köre, buña Rosaviatsiya: «İzin bermege mümkün» degen cevabını qaytardı.

«Ural ava yolları» Aqmescitten Tel-Avivge de barmağa istey edi, amma bunı oña musaade etmediler, çünki, ava akimiyetiniñ malümatına köre, «Aqmescit Rusiye ve İsrail arasında uçuş yolu cedveline kirmey», qayd ete haber agentligi.

Rusiyeniñ Qırım işğalinden soñ aeronavigatsiya havfsızlığı boyunca avropalı teşkilâtı Qırımğa, Aqmescit ve Aqyar ava limanlarına uçuşlarnı yasaq etti. Teşkilâtnıñ malümatına köre, Aqmescit ve Aqyarğa uçuşlar ilerideki bildirüvler qadar yasaqtır. Bunıñ ile uçuş yollarını saylağanda, Ukraina, Romaniya, Bulğaristan, Türkiye dispetçer merkezleri ile uyğunlaşmağa tevsiye eteler.

Aprel ayında Rosaviatsiya «Groznıy avia» ava şirketine Aqmescitten İstanbul, Tel-Aviv, Yerevan ve Antalyağa uçuşlarnı etmege yasaqladı. Bunı Aqmescit ava limanı halqara olmağanı ile añlattı.

İyün başında Rusiye baş naziri Dmitriy Medvedev Aqmescit ava limanınıñ halqara seferlerge açılması içün avale imzalağan edi.

Şimdi Qırımda yalıñız Rusiye Federatsâisınıñ ava şirketleri çalışmaqta.

XS
SM
MD
LG