Ukraina yırcısı Camalanıñ qorantası işğal etilgen Qırımda qala. Yırcı yarımada Ukrainağa qaytacağına alâ daa inana.
Bunı Camalara Open People neşirine aytqan edi.
«Ana-babam Qırımnı terk etip olamay. Anda menim qartbabam yaşay, ev, bağça. Bunı episini nasıl qaldıracaqmız? Biz mekânımıznı tola-tola qura edik ve endi qaçıncı sene qurmağa devam etemiz, – dey Camala. – Qırım Ukrainağa qaytacağına inanam. Biriniñkini almağa mümkün degil, olmay. «Karma Police» qabaatlılarğa kelir».
Onıñ fikrince, şimdi Ukrainada kontsertlerni keçirmege kerek, çünki muzıka, dey yırcı, «yaralanğan göñüller içün ilâcdır. Bu cehennemden qaçmağa istegenler içün kerek».
2014 senesi mart 16 künü Qırım ve Aqyarda yarımadanıñ statusı aqqında «referendum» keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ bu saylavnı tanımadı ve Rusiye Qırımnı işğal etti dep qayd etmekte.
