Link açıqlığı

Şimdi iqtisadiy meselelеr boyunca Qırımnıñ «baş naziri» keñeşçesi olğan «sabıq baş nazir muavini» Rustam Temirgaliyev Avropa vazgeçken Qırım mahsulatını rağbetleştirmek içün Qıtayğa ketti.

Bunı Komsomolskaya pravda bildire.

Temirgaliyev neşirge aytqanı kibi, «Qırım Titanı» ve «Qırım soda zavodı» himik şirketleriniñ mahsulatı esasen avropalı memleketlerge yollanıldı (Avstriya, Yunanistan, Macaristan, İspaniya). Bundan da ğayrı, şarapnı Almaniya, Belgiya, Felemenk, İtaliyağa alıp barğan ediler.

«Bizde Rusiye bol çarşısı endi bar, mında Qırım mahsulatı şubesiz satılır. Himik mahsulatı aqqında aytacaq olsaq, şimdi İndistan ve Qıtay ile muqaveleler azırlana. Cumaertesi künü, iyün 28-de, men Rusiye ükümeti ile eyyet terkibinde Qıtayğa yol alam, mında Qırım mahsulatınıñ rağbetleştirüv meseleleri baqılacaq», – dedi o..

İyün 23 künü Avropa Birligi Şurası Ukrainada resmiyleştirilmegen Qırım mahsulatınıñ ketirüvini yasaq etti.

XS
SM
MD
LG