Bazar künü, iyünniñ 29-da, Ukraina prezidenti Petro Poroşenko, Almaniya kantsleri Angela Merkel, Frenkistan prezidenti Fransua Olland ve Rusiye prezidenti Vladimir Putin dört taraflı telefon subeti devamında Donbassta barışıq planınıñ yerine ketirilmesini muzakere ettiler.
Ukraina devlet yolbaşçısı subetdeşlerine bergen malümatqa köre, Ukraina barışıq planınıñ talaplarına riayet ete ve iyünniñ 30 saat 22:00 qadar ilân etilgen ateş toqtatılmasından vazgeçmey, dep haber ete devlet yolbaşçısınıñ matbuat hızmeti.
Poroşenko soñki künler devamında boyevikler tarafından ucumlar devam etkenini bildirdi.
Ukraina prezidenti barışıq planınıñ şartlarına riayet etmek, ukrain arbiyleri ve blokpostlarğa qarşı ucumlarnı toqtatmaq ve esir alınğanlarnı azat etmege çağırdı.
Ukraina prezidenti Rusiye zenaatdaşına muracaatta bulunıp, Rusiye tarafından devlet sıñırını quvetleştirip, Ukrainağa boyevikler, silâlı adamlar kelmesi ve silâ ve arbiy tehnika kirsetilmesini toqtatmağa çağırdı.
Subet neticesinde Ukraina prezidenti devlet sıñır hızmetiniñ reisine Rusiye Federal sıñır hızmeti ile mesleatlar keçirip, Ukraina-Rusiye sıñırı üzerinde nezaret semereligini temin etmege çağırdı.
Taraflar iyünniñ 30-da aynı formatta subetni keçirmege añlaştılar. Bundan ğayrı, eñ yaqın vaqıtta Üç taraflı kontakt gruppasınıñ ileri işi aqqında añlaştılar.
İlk dört taraflı telefon subeti mayısnıñ 25-de keçirilgen edi.
