Ukraina prezidentiniñ Memuriyet binası yanında Şarqta barışıq ilân etilmesine qarşı çıqqan yüzlernen adamlar toplaştı.
Adamlarnı Memuriyet binası yanında toplaşmağa çağırğan «Donbass» batalyonınıñ komandanı adamlarnı özüni lâyıq bir şekilde alıp barmağa – bir şeyni atmamaq, sındırmamaq ve «moskallerge» oşap ketmemege çağırdı, dep haber ete «Ukrainskaya pravda».
«Donbass» batalyonınıñ diger vekili Ukraina prezidenti Petro Poroşenkoğa ukrainlilerden muracaatnı seslendirdi. Oña binaen, barışıq toqtatılmaq, Ukrainada arbiy vaziyet ilân etilmek, arbiylerni zarur olğan silânen temin etmek ve terroristlerni yoq etüv tedbirlerini başlamaq, AB ve AQŞ-dan Rusiyege qarşı cezalarnıñ 3-ünci basamağı talap etilmek kerek.
Bundan ğayrı, muzakerelerden Medvedçuk, Şufriç ve «diger satqınlarnı» çetleştirmege talap etildi.
Prezident memuriyetiniñ yolbaşçı muavini Gennadiy Zubko bildirdi ki, Ukraina tarafından resmiy vekil tek Leonid Kuçma olğan edi.
Miting iştirakçileri öz muracaatını Zubkoğa berip, Maydanğa halq toplaşuvına yol aldılar.
Malüm olğanı kibi, iyünniñ 27-de prezident Petro Poroşenko «barışıq» müddetiniñ daa 72 saatke arttırılması aqqında qarar aldı.
