İyünniñ 28-den 29-na keçer gecesi boyevikler terrorizmge qarşı tedbirler keçirilgen yerde ukrain ordusı bulunğan bir qaç yerge qarşı ateş açtılar.
Arbiy-siyasiy tedqiqler Merkeziriniñ reberi Dmıtro Tımçuk malümatına köre, Kramatorsk ava limanına qarşı eki kere minaatıcıdan ateş açıldı. Ateş şeer mezarlığı ve Kramatorsknıñ şimal tarafından açılğan edi.
Bundan ğayrı, Slavânsk ve Krasnıy Liman yolları rastkelgen yerde blok-postqa qarşı ateş açıldı.
«Birükovo» sıñır kiriş noqtası yanındaki ukrain ordusınıñ istinat noqtası da minaatıcı ateşke oğradı.
Tımçuknıñ bildirgenine köre, ukrain arbiylerinden iç bir kimse zarar körmedi.
