BMT Baş kâtibi Pan Gi Mun Ukraina şarqında mesleatlarnıñ keçirilüvini alğışladı ve ziddiyet taraflarını ateş toqtatuv rejimini bozmamağa çağırdı.
Bu aqta teşkilâtnıñ resmiy temsilcisiniñ beyanatında söz kete.
«Baş kâtip taraflar öz mecburiyetlerine riayet eteceklerine ümüt besley ve olarnı zorbalıqnı siyasiy ketişat vastası ile toqtatmağa çağıra», – denile beyanatta.
Ukraina prezidenti Milliy havfsızlıq ve mudafaa şurasınıñ qararı ile ateş toqtatuv rejiminiñ müddetini bazarertesi künü, iyün 30-na, saat 22:00-gece uzattı.
Poroşenko iyün 30 kününe qadar Ukraina prezidentiniñ barışıq planı amelge keçirilecegini bekley.
İçki işler nazirliginiñ başı Arsen Avakovnıñ malümatına köre, bu afta devamında boyeviklerniñ areketleri neticesinde 20-den ziyade arbiy adamı elâk oldı.
