Ukraina prezidenti Milliy havfsızlıq ve mudafaa şurasınıñ qararı ile ateş toqtatuv rejiminiñ müddetini bazarertesi künü, iyün 30-na, saat 22:00-gece uzattı.
Bunı devlet başınıñ matbuat hızmeti bildire.
Beyanatta aytalğanı kibi, Poroşenko iyün 30 kününe qadar Ukraina prezidentiniñ barışıq planı amelge keçirilecegini bekley.
Bundan da ğayrı, devlet başı ateş toqtatuav rejimine riayet etüv OBSE nezaretçileri tarafından közetilecegine ümüt ete.
Bunıñ ile Ukraina devlet sıñır hızmetiniñ nezaretine İzvarino, Doljanskiy, Çervonopartizansk noqtaları berilmeli ve olarnıñ işi ğayrıdan tiklenmeli; reineler azat etilmeli.
Keñeş neticesinde Ukraina ateş toqtatuv müddeti devamında Rusiyede ücretli askerlerniñ qabul etüv noqtaları qapatılacağını, Donetsk ve Lugansk vilâyetlerinde qanunsız silâlı teşkilâtlarnıñ areketi toqtatılacağını bekley, denile beyanatta.
Donbass sakinlerine keder etken inşalarnıñ quruluvı ateş toqtatuv rejiminiñ bozuluvı sayılacaq.
Eger de ateş toqtatuv rejiminiñ şartlarına riayet etilmese, Ukraina işbu rejimni müddetten evel toqtata bilecek, qayd ettiler matbuat hızmetinde.
Ukraina prezidenti Brüsselden qaytıp, arbiyler ile keñeşni keçirdi.
İyün 27 künü saat 22:00 Ukraina şarqında iyün 20 künü prezident Petro Poroşenko tarafından ilân etilgen ateş toqtatuv rejiminiñ müddeti soñuna yetti.
Boyevikler şartlarğa riayet etmey edi, ukrain arbiyleriniñ mevzilerine ateş aça edi. İçki işler nazirliginiñ başı Arsen Avakovnıñ malümatına köre, bu afta devamında boyeviklerniñ areketleri neticesinde «20-den ziyade arbiy adamı elâk oldı, zarar körgenlerniñ sayısı ğayet büyüktir».
