«DHC» ve «LHC» temsilcileri iyün 30-ne qadar ateşni toqtatmağa vade ettiler.
Bunı cuma künü Donetskte Ukraina şarqında vaziyetniñ tınçlandıruvı boyunca mesleatlardan soñ «DHC» «baş naziri» Aleksandr Boroday bildirdi, dep yaza «RİA Novosti».
«Poroşenko (Ukraina prezidenti) iyün 30-na qadar ateşni toqtatmağa vade etkenini bildik, biz de, öz tarafımızdan, bu müddet devamında ateş açmamağa vade etemiz», – dedi Boroday.
Belli olğanı kibi, iyün 20 künü Poroşenko Silâlı quvetleriniñ, Milliy gvardiya ve sıñır hızmetiniñ bölüklerine ateşniñ toqtatıluvı aqqında emir bergen edi.
Bazarertesi künü Ukraina, Rusiye ve «DHC» ve «LHC» terroristik teşkilâtınıñ temsilcileri ile muzakerelerden soñ boyevikler iyün 27 kününe qadar barışıqnıñ saqlanmasına razılığını bildirgen ediler.
Salı künü Slavânsk civarında Karaçun dağnıñ yanında boyevikler Mi-8 ukrain arbiy vertolötnı urıp tüşürdiler. Bunıñ ile boyevikler ATO noqtasına ücüm etti ve 2 arbiyni öldürdiler, daa üçü zarar kördi.
İyün 24 künü Poroşenko ukrain arbiylerine terroristlerniñ areketlerine qarşı beklemeyip ateşni açmağa avale etken edi.
İyün 27 künü Poroşenko Donbassta ateş toqtatuv rejiminiñ devam etilecegi aqqında qarar almağanını bildirgen edi.
Rusiye prezidenti Vladimir Putin Ukraina Donbassta ateşniñ toqtatuv rejimini devam etmek kerekligini bildirgen edi.
