Dnepropetrovsk vilâyet devlet memuriyeti yanında cuma künü «Kommunizm ğalebesi qaçınmaz» yazısı ile Lenin abidesini devirdiler.
Azatlıq Radiosı mühbiriniñ malümatına köre, kommunal hızmetçileriniñ işini seyir etmek ve hatıra içün fotolarnı çekmek içün Dnepropetrovsknıñ onlarce sakini keldi. Abide turğan yerinde iştirakçiler bor ile: «Evge, Moskvağa ketti. Ukrainağa şan-şüretler olsun» degen yazını qaldırdılar.
Dnepropetrovsk vilâyetiniñ milliy qoruv ştabı yolbaşçısı Yuriy Berözanıñ sözlerine köre, abideni ştabnıñ teşebbüsi ile devirdiler. Leninni müzeyge berecekler. Onıñ yerine Ukraina qaramanlarına ve ATO alanında elâk olğan ukrain arbiylerine abideni tikleycek olalar.
«Dnepropetrovsk vilâyetinde milliy imaye ştabınıñ qararı ile bugün Ukrainada totalitar rejiminiñ «bir noqtası» yoq etildi. Biz çet putlarnı saqlap ve qorçalap olamaymız. Vatanperverler ise onı endi bir qaç kere yoq etmege tırışqan edi. Biz vatanperverler olıp, bunı cemaat ögünde yapıp, tarih çöplük obasına yolladıq, yeri andadır. Mında tek Maydan Qaramanlarnıñ yolçuğı degil de, Ukrainanıñ Qaramanları yolçuğı olacaq», – dedi Beröza.
2014 senesi fevral ayında «Pravıy sektor» Dnepropetrovsk faaliyetçileri şeerniñ merkeziy meydanında Lenin abidesini devirdiler.
